Nú hefur veðrið aðeins verið að minna á sig og allra veðra von á þessum árstíma.  Því er mikilvægt að foreldrar fylgist með veðri og veðurspám og hagi sér í samræmi við aðstæður hverju sinni.  Foreldrar leggja sjálfir mat á hvort fylgja þarf barni í skóla þótt engin tilkynning hafi borist frá yfirvöldum. Meti foreldrar aðstæður svo að ekki sé óhætt að börn þeirra sæki skóla þá skulu þeir tilkynna skólanum um það og lítur skólinn á slík tilvik sem eðlileg forföll.

Sjá nánar: 

• Röskun á skólastarfi vegna óveðurs - Tilmæli um viðbrögð foreldra og forráðamanna
• Vefur Slökkviliðs höfuðborgarsvæðisins

Minnum á SAMRÁÐSDAGINN sem er á morgun, miðvikudaginn 25. janúar. Allir hafa nú fengið ákveðinn fundartíma sendan heim og hlakkar starfsfólk skólans til að hitta nemendur og foreldra og fara yfir starfið það sem af er skólaárinu og leggja línurnar fyrir vorönnina.

Klapparholt er opið á samráðsdegi. Þeir foreldrar sem nýta sér þjónustu þess eru beðnir að láta skrá á hvaða tíma eða hvort barn þeirra verður í Klapparholti þennan dag í síma 664-7524.

Þessi vika er óvenjuleg í unglingadeildinni okkar. Nemendur fengu að ráða viðfangsefni Smiðju sem skyldi standa alla vikuna og varð Harry Potter fyrir valinu. Nemendur sjálfir sjá um allt skipulag Smiðjunnar og hafa legið yfir aðalnámskrá grunnskóla undanfarið. Í dag var valið í heimavistir með aðstoð flokkunarhattsins og á dagskrá vikunnar eru tímar í sögu galdranna, vörnum gegn myrku öflunum, galdraseyðagerð og þar fram eftir götunum.